Prishtinë, më 11.05.2020 – Revista Drini
Vjosa Osmani, Kryetarja e Kuvendit të Kosovës, përmes një postimi në fb sot e ka shprehur shqetësimin e saj njerëzor dhe dhe kombëtar në emër të institucioneve të Republikës së Kosovës për dëbimin e madh e të pandalshëm të popullisë shqiptare nga Medvegja, Bujanoci e Presheva. Për këtë politikë gjenocidale ndaj një populli të pambrojtur që jeton që nga lashtësia parahistorike në vendin e vet, Vjosa në postimin e saj në fb ndër të tjera ka thënë:
Spastrimi i heshtur etnik organizuar nga shteti serb në Medvegjë, Preshevë e Bujanoc
Rreth 60 kilometra në veri-lindje të Prishtinës, shtrihet komuna e Medvegjës. Kjo komunë, në regjistrimin e vitit 2011 numëronte 7438 banorë. Tani, ndonëse pa statistika zyrtare, supozohet se në Medvegjë janë të regjistruar afërshisht vetëm 600 shqiptarë.
Veshje tradicionale e femrave të Medvegjës – Leskocit.
Ky reduktim sistematik i popullsisë shqiptare në Medvegjë nuk është i rastësishëm. Privimi nga edukimi e punësimi, cënimi i të drejtave në gjuhë e përfaqësim si dhe shtypja e vazhdueshme e regjimit serb kundrejt shqiptarëve në ato lokalitete ka ndikuar në dyndje të popullësisë shqiptare, për të kërkuar kushte më të mira për familjet e tyre.
Medvegja, një vendbanim i stërlashtë shqiptar,
prej të cilit Serbia është duke i dëbuar shqiptarët e fundit …
Megjithatë, përgjatë viteve të fundit, Medvegja është vënë në shënjestër të politikës serbe, duke tentuar largimin përfundimtar të çdokujt që flet shqip në ato anë. Gjatë vetëm katër viteve të fundit autoritetet serbe kanë fshirë mbi 4 mijë shqiptarë nga regjistri civil në komunën e Medvegjës. Përmes ‘pasivizimit të adresave’ të vendbanimit, shteti serb bënë largimin përfundimtar të shqiptarëve nga regjistri civil i Serbisë, duke ua pamundësuar marrjen e dokumenteve të reja, të drejtën e qasjes në shërbime mjekësore ose asistencë sociale e madje edhe largim nga lista e votuesve, që pamundëson pjesëmarrjen në zgjedhje.
Çun Lajçi në Starabaj të Medvegjës prej nga Serbia për ditë po i ndjek shqiptarët e privuar prej të gjitha të drejtave; të drejtës për shkollimin në gjuhën amtare, asaj për punë dhe për të jetuar si njerëz, duke ua lënë shtëpitë e shkreta nga dëbimet e programuara dhe braktisja e dhunshme nga shtëpitë dhe pronat e tyre, sikurse që është kjo shtëpi që shihet në këtë foto të aktorit tonë të madh dhe askush nuk reagon për këtë vrasje të heshtur të një populli në vendin e vet…
Askujt në Shqiptari e as në botë nuk i dëgjohet zëri e asnjë fjalë goje për ta ?!… Duhet të pyesim qartë e zëshëm: Pse serbët e Kosovës qenkan më të rëndësishëm se Shqiptarët e Luginës së Preshevës dhe Shqiptaro-Boshnjakët e Sanxhakut ?
Problemi tjetër në pasivizimin e adresave të shqiptarëve në Serbi është edhe fakti se për një veprim të tillë shteti serb nuk lëshon fare një vendim me shkrim që dëshmon se ju është pasivizuar adresa. Kjo informatë kumtohet vetëm gojarisht. Ky veprim nuk është i rastësishëm: ai synon t’i parandalojë qytetarët shqiptarë të ndërmarrin veprime ligjore kundër Serbisë për shkelje të të drejtave të tyre dhe diskriminim në baza etnike.
Përveç në Medvegjë, pasivizimi i adresave është evidentuar edhe në dy komunat tjera me popullsi shqiptare, Bujanoc e Preshevë. Ky fakt është i njohur, e madje i dokumentuar nga organizata të ndryshme që veprojnë në Serbi dhe jashtë saj.
Përkundër thirrjes së shpeshtë për ndihmë nga veprimtarët dhe aktivistët shqiptar nga Medvegja, kërkesat e tyre mbeten të paadresuara. Republika e Kosovës nuk mund të heshtë më! Adresimi i çështjes së lirive dhe të drejtave të njeriut të shqiptarëve në Luginën e Preshevës duhet të bëhet në të gjitha instancat, brenda dhe jashtë vendit. Ky nuk është thjeshtë një problem i izoluar: veprimet e shtetit serb karshi shqiptarëve të Luginës ngërthejnë në vete shkelje fundamentale të të drejtave të njeriut. Një shtet që aktivisht angazhohet në spastrim etnik, edhe pse me metoda të ‘sofistikuara’ siç është pasivizimi i adresave, nuk e meriton anëtarësimin në BE.
