Shkruan: Florim Zeqa, 27.09.2018
Me 24 shtator 2018 në Londër (Mbretëria e Bashkuar), Rrjeti Global i Bizneseve të Diasporës Shqiptare e mbajti Kuvendin Zgjedhor. Të pranishëm në kuvend ishin pothuajse shumica e kryetarëve e të gjitha Rrjeteve të Bizneseve të Diasporës Shqiptare (të themeluara në katër kontinente të botës).
Punimet e kuvendit filluan me prezentimin e punës dhe aktiviteteve katër (4) vjeçare të rrjetit si dhe raportit financiar për periudhën katër (4) vjeçare të veprimtarisë së rrjetit.
Pas diskutimeve të punës së rrjetit dhe aktiviteteve të realizuara për këtë periudhë kohore të funksionimit të rrjetit, me shumicë të votave nga të pranishmit u aprovua prezantimi/raporti i punës dhe aktiviteteve të rrjetit të në përgjithësi. Me ritmin e njëjtë të punës, Kuvendi vazhdoi edhe me raportin financiar të katërvjeçarit të kaluar të aktiviteteve të rrjetit (prej themelimit deri më tani),
Në pjesën e dytë të punës së Kuvendit Zgjedhor, punimet vazhduan me zgjedhjen e kryesisë së re dhe zgjedhjen e presidentit të Rrjetit Global të Bizneseve të Diasporës Shqiptare.
Pas propozimeve për kryesinë e re, me shumicë apsolute të votave u zgjedh kryesia e re në këtë përbërje:
1) President i Rrjetit Global të Bizneseve të Diasporës Shqiptare u rizgjedh z. Nazar Mehmeti, afarist i suksesshëm dhe veprimatari i shquar i çështjes kombëtare nga Dallas/Texsas në Shtetet e Bashkuara të Amerikës, me mandat katër (4) vjeçar;
2) Nënkryetar për Evropë u zgjedh z. Artan Llabjani;
3) Nënkryetar për Shetet e Bashkuara të Amerikës u zgjedh z. Elmi Berisha dhe
4) Sekretar Gjeneral i Rrjetit Global të Bizneseve të Diasporës Shqiptare, u rizgjedh z. Ismet Smajli.
Punimet e Kuvendit të Rrjetit Global të Bizneseve të Diasporës Shqiptare, në pjesën e tretë përkatësisht të fundit të punimeve, u mbyllën me diskutime dhe propozime për planet e punës së rrjetit në katër (4) vitet e ardhshme si dhe për mundësitë e realizimit të projekteve për investime kapitale në të gjitha viset shqiptare.
Në fund ia vlenë për të theksuar, se Rrjeti Global i Bizneseve të Diasporës Shqiptare (RRGBDSH), i themeluar katër vite më parë, është organizim apartiak, i cili qëllim parësorë ka unifikimin e bizneseve shqiptare në botë, për realizimin e investimeve kapitare në trojet etnike shqiptare.
Për këto katër vite, RRGBDSH-ja ka organizuar shumë takime e konferenca biznesore, ka shtrirë rrjetin e saj në të gjitha kontinentët dhe shtetet ku ndodhet mërgata e jonë.
Ashtu sikurse që është vullneti dhe dëshira për investime, ekziston edhe mundësia e bashkëpunimit të bizneseve për një kauzë të përbashkët; për rimëkëmbjen ekonomike të vendeve tona pavarësisht shtrirjes gjeografike, përkatësisë ideologjike apo fetare.
Mirëpo për realizimin e investimeve kapitale në vendlindje, RRGBDSH përveq sigurisë së investimeve, kërkon që të hiqen të gjitha barrierat burokratike për krijimin e kushteve më të volitshme për investime kapitale në trojet shqiptare, të cilat përveq gjenerimit të vendeve të punës, do të parandalonin në masë të madhe trendin e keq të largimit e të rinjëve nga trojet e tyre stërgjyshore.
Siq duket, sukseset e RRGBDSH-së janë bërë halë në sytë e politikanëve pseudopatriotë, të cilëve më shumë se shteti ju intereson pushteti dhe pasurimi i paligjshëm.
Një pjesë e madhe e drejtuesve të këtij rrjeti janë veprimtarë të devotshëm të çështjes kombëtare nga vitet e ’90-ta e deri në ditët e sotme. Sa prej tyre ishin dhe janë humanist të dëshmuar të çështjes kombëtare, filluar nga ndihmat e pakursyera për lëvizjen paqësore të viteve të ’90-ta, arsimin shqip në Republikën e Kosovës dhe financues të luftës çlirimtare e deri të ndihmat e çmuara materiale në rindërtimin e shtëpive në Kosovën e pasluftës.
Në rrethanat e mjegullës politike në njërën anë dhe mungesës së zhvillimit ekonomik në anën tjetër, RRGBDSH ka mbetur e vetmja shpresë reale e zhvillimit ekonomik të vendit dhe mirëqënjes së qytetarëve të Kosovës.
Bazuar në rrjedhën e Kuvendit të Rrjetit Global të Bizneseve të Diasporës Shqiptare, punimet e këtij kuvendi rezultuan me sukses të plotë, ndërsa kryesisë së re të rrjetit të kryesuar nga Presidenti i nderuar Z. Mehmeti, i urojmë punë të mbarë dhe suksese edhe më të mëdha në katër (4) vjeçarin e ardhshëm.
