Arben Çokaj
Ka njerëz që kujtojnë se pse kemi patur vezirë e pse i kemi shërbyer Turqisë gjatë pushtimit 523 vjeçar, paskemi qenë mirë, sejmenë të turkut. Po çfarë bëri Turqia për ne? Na vrau e na preu!
Turqia e sotme po islamizohet. Po kalon nën një sistem diktati. Turqia e sotme e Erdoganit ecën nën shembullin e madhështisë së Perandorisë osmane, mbron ato vlera, dhe synon të ngjallë kulturën neo-osmane në Ballkan, sidomos në Bosnje e në trojet shqiptare. Po financon vazhdimisht për këtë. Por sa na intereson ne kjo? Kjo na e cënon identitetin tonë shqiptar dhe na e zëvendëson me atë islam.
Tani sa për info për ata, që duket se nuk i kuptojnë mirë këto gjëra, e kujtojnë se unë po flas pa lidhje. Mendoni e përgjigjiuni këtyre pyetjeve: Më gjeni një vend musliman, demokratik e të zhvilluar, që ju mendoni se ne duhet të bëhemi si ai? Duke kultivuar islamin, ne a kemi më shumë shanse të bëjmë një shtet musliman, apo demokratik e evropian? Ku shkojnë shqiptarët etj. më shumë kur emigrojnë, në vendet e Perëndimit apo në Turqi, e vendet muslimane dhe pse?
Nëse i hyjmë historisë, thjeshtë për 523 vjet pushtim, Turqia na ndau në 4 vilajete me shumicë shqiptare, pse? Na mohoi gjuhën shqipe. Më 1881 kishte mijëra shkolla turke, mijëra shkolla greke e sllave në trojet shqiptare, po shkollë shqipe? Vetëm 1, atë të Pandeli Sotirit, që e vranë më pas grekët.
Pushtimi turk na ndau në 4 fe, pse thua vallë? Na islamizoi, që të jemi delja e zezë e Ballkanit e në konflikt të përhershëm me fqinjët. A na intereson ne konflikti me fqinjët? Shtroi për 523 vjet vetëm 5 km. rrugë. Kjo është ajo që Turqia ka bërë për ne. Na ka përdorur dhe ka përfituar prej nesh – e vazhdon të na përdorë. Por ne na ka vrarë e prerë dhe na ka rrënuar në fakt. Atëherë përse duhet t’i respektojnë ne turqit vallë?
Austro-Hungaria që erdhi pas ikjes së Turqisë nga Ballkani, shtroi 400 km. rrugë për 3 vjet në trojet shqiptare. E shumë shqiptarë, prapë nuk e shohin ndryshimin, duan turkun më shumë se Evropën. Austro-Hungaria synoi të na bënte shtet të pavarur, Ndërsa Turqia na sillet si pronar në trojet tona përmes islamit dhe na imponon të respektojmë herojtë e saj, si sulltan Mehmet Fatihun, pushtuesit tanë, t’i quajmë edhe çlirimtarë. Turqia e rrezikon ekzistencën identitare shqiptare, ne duhet të kemi kujdes ndaj saj, por nuk po kemi, se kemi shumë njerëz të pa-ndërgjegjësuar, që për hir të fesë islame, ushqejnë dashuri për pushtuesin e dikurshëm… E kjo na rrezikon.
Por ne, nëse nuk marrim një orientim të qartë të modelit të një shteti evropian, jemi të humbur… Prandaj unë shkruaj herë pas here në këtë drejtim – për ndërgjegjësim. Shkollim e dije, punë e zhvillim, e orientim të qartë Evropian, pa luhatje, pa ekuivoke. Turqinë, Rusinë e fqinjët i kemi provuar, jemi kombi më i prapambetur e më i coptuar në Ballkan.
Duhet një vizion tjetër, që ta nxjerrim gomarin tonë nga balta.
