ClassLifeStyle.com, 2 TETOR 2020
Përktheu Arben Çokaj
Prestigjiozja britanike “The Economist” u ka kushtuar një artikull artistëve shqiptarë që po pushtojnë botën në fushën e muzikës; Rita Ora, Ava Max dhe Rita Ora.
“Deri vonë, shqiptarët më të famshëm etnikë ishin Nënë Tereza dhe diktatori komunist Enver Hoxha. Tani këngëtarët duhet t’i shtohen shenjtorit dhe mëkatarit“, – fillon artikullin revista britanike.
Dua Lipa ka 55 milion dëgjues në platformën muzikore Spotify, Bebe Rexha ka 24 milion, Rita Ora ka pasur pesë hite në vendin e parë në Britani dhe ka qenë anëtare e jurisë në ‘X Factor’. Era Istrefi këndoi në Kupën e Botës FIFA 2018. Njomza Vitia, një këngëtare dhe tekstshkruese, dhe Labinot Gashi, një reper, gjithashtu kanë një audiencë globale.
Single seksi i Ava Max, “E ëmbël por psiko” konsiderohet në të gjithë botën më argëtuese sesa oferta letrare e Hoxhës: “Shqipëria sfidon revizionizmin e Hrushovit“.
Në vitin 2016, me një stil jashtëzakonisht serioz, Rita Ora performoi në Romë për të festuar shenjtërimin e Nënë Terezës.
Të gjithë këta yje me origjinë shqiptare, përveç Era Istrefit, u rritën në diasporë. Lipa, Max, Rexha dhe Vitia kanë lindur në Londër, Milwaukee, Brooklyn dhe Stuttgart. Vetëm Max ka rrënjë në Shqipëri, pjesa tjetër janë me origjinë nga Kosova, përveç BeBe Rexha, familja e të cilës vjen nga Maqedonia Veriore.
Yjet e Diasporës shpesh janë krenarë për kombësinë e tyre. Ata interpretojnë në shtëpi, duke u mbështjellë me flamuj kosovarë ose shqiptarë.
“Zemra ime gjakos shqip“, tha Bebe Rexha gjatë një vizite në Shqipëri. Në korrik, Dua Lipa ndezi një debat pasi postoi një hartë të lidhur me nacionalistët ekstremistë shqiptarë që shfaqnin Shqipërinë e Madhe.
Prindërit e tyre u rritën jashtë vendit pasi u larguan nga Ballkani në fillim të viteve 1990. Por nuk ishte gjithmonë një histori e pasurimit të të varfërve. Familjet Ora dhe Lipa ishin pjesë e elitës në Kosovë. Dy vajzat ndoqën një shkollë të njohur arti në Londër.
Yjet e muzikës pop, së bashku me një grup futbollistësh shqiptarë në skuadrat kryesore të Evropës, luajnë një rol shumë të rëndësishëm për të ndihmuar në ndryshimin e imazhit të shqiptarëve, shkruan ‘The Economist‘, duke lavdëruar artistët shqiptarë, që kanë pushtuar botën, por edhe të gjithë të tjerët Shqiptarët që kanë shkëlqyer në fusha të tjera të jetës.
