Shkruan: Florim Zeqa, 01.12.2021
Kohë më parë pas një kundërshtimi që e bëra kundër deklarimeve pa mbulesë të historianes Elena Kocaqi ndaj dy figurave të njohura kombëtare, po citoj; “Austria kërkoi Shqipërinë etnike, por Isa Boletini bëri pazare me serbët dhe Ismail Qemali me grekët”, filluan komentet pro&kontra në rrjetin social “Facebook”. Përderisa injorantët i merrnin si të vërteta, pjesa intelektuale i merrnin me rezervë deklarimet e “historianes”.
Më i lehtë është plumbi i armikut sesa tradhtia e mikut në prapaskenë
U mundova ta bindi një mik timin se Isa Boletini nuk është tradhëtarë, por ishte e kotë, për shkak të hipnozës që kishte marrë nga “historianja”. Me qëllimin më të mirë të ikjes së konfrontimit virtual me mikun, e vendosa ta ndërprejë përkohësisht komunikimin me të në rrjetin social. Miku që e “bllokova”, në murin e tij e kishte bërë publik largimin bashkë me një reagim timin që i bëra privat në inbox.
Por çfarë ndodhi më pas?!
Disa nga miqët virtual duke qenë të bindur se unë nuk i shohë më në murin e mikut të “bllokuar”, kishin filluar të ç’fryhen me komente kundër meje, duke më quajtur ashtu e kështu si ua kishte dashtë ëndja, madje disa kishin shkuar përtej kësaj…
Në kohën e “shundit dhe kiqit” historik jo rrallë dëgjojmë dhe lexojmë deklarata prej më skandalozeve dhe baltosje të figurave më të shquara të historisë sonë kombëtare, filluar nga Skënderbeu, Ismail Qemali, Isa Boletini e deri tek i fundit Ibrahim Rugova, por asnjëherë nuk thyhemi nga të pavërtetat e lansuara të pseudohistorianëve sa thyhemi keq nga tradhtia e miqve në prapaskenë!
Ketë e beson vetëm ai që është provuar me tradhëtinë e mikut dhe dhunën e armikut!
Problemi është se disa më shumë i qëndrojnë besnik tradhtisë sesa miqësisë! Prandaj ekziston ai proverbi “nga sulmet e armikut e kam lehtë të mbrohem, por nuk e di si të mbrohem nga tradhtia e mikut”!
Rreziku nga tradhtia më e madhe është prej atyre që iu bën mirë sesa prej atyre që nuk ke bërë gjë për ta.
Historia e copëtimit të tokave shqiptare vazhdon…
Sikurse që nuk është hera e parë që baltosen figurat historike, nuk është hera e parë që tradhtohen shqiptarët. Sikurse që u ndamë pamëshirshëm 109 vite më parë nga “Konferenca e Paqes në Londër”, i cili ishte një takim ndërkombëtar i gjashtë fuqive të mëdha të asaj kohe (Britania e Madhe, Franca, Gjermania, Austro-Hungaria, Rusia dhe Italia), siç duket jemi ndarë keq edhe në Marrëveshjën e Kumanovës të vitit 1999, e njohur si Marrëveshja ushtarako-teknike mes gjeneralëve të NATO-s dhe ushtrisë serbe, e cila i dha fund dhunës serbe në Kosovë si një parakusht për ndaljen e bombardimeve të NATO-s mbi caqet strategjike serbe (e nënshkruar nga Michael Jackson, komandanti i parë i KFOR-it në Kosovë, dhe ish-shefi i Shtabit të Armatës së Serbisë, gjenerali Nebojsha Pavkoviq).
Sikurse 109 vjet më parë, edhe në vitin 1999 askush nuk na pyeti neve shqiptarëve sesi do të duket harta gjeopolitike e Kosovës, por në mënyrë të njëanshme i vendosen forcat paqeruajtëse ruso-franceze mbi urën e lumit Ibër në Mitrovicë për ta ndarë pjesën veriore të Kosovës, ndarje faktike e cila është prezente edhe pas 22 vitesh, porqë tani po kërkohet të legalizohet nga bashkësia ndërkombëtare nën kërcënimet e kthimit të Kosovës në pikën zero të vitit 1999.
Sikurse ndarja e Shqipërisë 109 vjet më parë që nuk ishte produkt i tradhtisë së shqiptarëve, edhe ndarja e Kosovës vitit 1999 nuk ishte e tillë. Por ishin dhe janë pazaret e fuqive të mëdha që po rëndojnë mbi trungun tonë kombëtar, duke shkëputur pjesë të territoreve shqiptare në këmbim të lirisë së fituar me gjak.
Andaj, të mos biem pre e gënjeshtrave dhe e mashtrimeve të pseudohistorianëve të ngarkuar me mision për ndarjen dhe përçarjen e shqiptarëve me shpikjen e “ujit të nxehtë” pas 100 vjetësh! Ngase askush deri më sot nuk ka mundur dhe nuk do të mund ta gjëjë një dokument që i vërteton marrëveshjet e “tradhtisë” së Ismail Qemailit e Isa Boletinit dhe as të Ibrahim Rugovës së epokës sonë.
