LUTJE PËR TË RREZATUAR JEZUSIN
I dashur Jezus! Më ndihmo ta përhap parfumin tënd kudo që të shkoj!
Mbushe jetën time me shpirtin e me jetën tënde! Depërtoje krejt qenien time aq shumë, saqë gjithë jeta ime të mund të jetë vetëm një rrezatim i jetës sate! Shkëlqe nëpërmjet meje dhe ji në mua deri në atë pikë, që çdo shpirt që unë të takoj, të mund të ndiejë praninë tënde në shpirtin tim! Bëj që të tjerët, ndërsa më shohin, të mos shohin më mua, por vetëm Jezusin!
Qëndro me mua e atëherë unë do të filloj të shkëlqej duke u bërë një dritë për të tjerët; drita, o Jezus, do të jesh Ti që shkëlqen mbi të tjerët nëpërmjet meje. Bëj që të të predikoj pa bërë predikime, jo me fjalë, por me praninë time dhe me forcën që ushtrojnë veprimet e mia: gjersa të dalë në pah plotësia e dashurisë që kam për Ty! Amen!
J.H. Newman
Përktheu: Nikolin Sh. Lëmezhi
LUTJE SHËN GJERARDO MAIELLA˗s
Lutje për jetën
O Zot Jezu Krisht! Përvujtërisht po të kërkoj, për ndërmjetësinë e Virgjërës Mari, nënës sate, e të shërbëtorit tënd besnik Gjerardo Maiella, që të gjitha familjet të dinë të kuptojnë vlerën e paçmueshme të jetës, sepse njeriu i gjallë është lavdia jote.
Bëj që çdo fëmijë, që nga çasti i parë i ngjizjes së tij në kraharorin amënor, të gjejë mikpritje bujare dhe të zellshme! Bëji të vetëdijshëm të gjithë prindërit për dinjitetin e madh që u jep atyre në të qenët baba e nënë! Ndihmoji të gjithë të krishterët që të ndërtojnë një shoqëri, në të cilën jeta është një dhuratë për t’u dashur, për t’u vënë në lëvizje dhe për t’u mbrojtur! Amen!
Përktheu: Nikolin Sh. Lëmezhi
