Fatmire Duraku
Lulja e dhembjes
(Trioleta)
I
Tre zogj e shkruajnë qiellin në lojë
Ndërsa i kaltër dremit liqeni malor
Luginës së gjelbër ti vjen i pagojë
Tre zogj e shkruajnë qiellin në lojë
Dashuria sesi mbeti vetëm rrënojë
Zemër e robëruar nga hiri kristalor
Tre zogj e shkruajnë qiellin në lojë
Ndërsa i kaltër dremit liqeni malor
II
Qe drenusha vjen ujë të pijë në liqe`
Agu prek syrin, zemrën ta zgjojë
Në mua dhembja varet në një pe
Qe drenusha vjen ujë të pijë në liqe`
Për erë të drenushës ja dhe një dre
Vjen tek shelgu i vjetër të mrizojë
Qe drenusha vjen ujë të pijë në liqe`
Agu prek syrin, zemrën ta zgjojë
III
Bota lëviz, unë rri e vetmuar fare
Që të agojë pres, të çelë lulja e syrit
Lulja gati e shkrumbuar në dritare
Bota lëviz, unë rri e vetmuar fare
Të çelë lulja e dhembjes në gastare
Lule-syri me ngjyrën e vet të hirit
Bota lëviz, unë rri e vetmuar fare
Që të agojë pres, të çelë lulja e syrit
Zjarri i vjetër
Mos lejo të të dehë pasqyra
Lulja e largët e ëndrrës
Bukuria perëndon me diellin
Kthehu nga unë dhe bari
Nga zjarri i vjetër kthehu
Nuk më sheh e sy ke
Ja unë nga notoj në sytë e tu
Në tingujt e harruar të këngës
Kthehu nga unë dhe bari
M’i zgjat duart
m’i zgjat duart nga atje
unë jam pranvera në lulëzim
lulja e ëndrrës mbi ballin e ditës
tingulli i këngës që rilind
m`i zgjat duart dhe eja
bashkë me zemrën
zog i lodhur në shtegtim
Letër të të shkruaj
Mbi tavolinë lapsi, letra
Unë kotem mbi to
Letër të të shkruaj
Do të duhej një det për ngjyrë
Do të duhej një pyll për lapsa
Të të them çfarë dua
Të ta them dhembjen
Të ta them vetminë
Të ta them jetën nga rrjedh
Të ta them jetën nga nuk rrjedh
Të ta them lulen nga çel në sy
Të ta them lulen nga vdes për ty
Të ta them dritaren e hapur
Të ta them dritaren e mbyllur
Të ta them shtëpinë me yll mbi çati
Të ta them shtëpinë pa yll në vetmi
Të ta them derën që s` hapet
Të ta them derën që hapet
Të ta them atë që dua
Letër të të shkruaj
Do të duheshin lisat e qyqavicës
Për të bërë lapsa me ta
Do të duhej gjithë llapi për ngjyrë
Siç thotë dhe Zejnullah Rrahmani
Në 99 rruzaret prej smaragdi
Në atë mrekullinë e vet të shkrimit
Mbi tavolinë lapsi, letra
Ngjyra e kuqe apo gjaku im
Letër të të shkruaj
