Ju lutemi ejani! Mos t’i lemë shtëpitë e pabanuara e qytetet fantazma
Nga Dom Gjergj Meta – temaedites.al – 15/02/2020
E di se dikujt nuk i pëlqen të dëgjojë përsëri nga goja ime fjalët që do them. Mund t’i duken të mërzitshme e bajate.
Por dua t’ju them nga thellësia e zemrës:
Mos ikni më nga Shqipëria! Ju lutem mos ikni! Mos t’i lejmë djerr tokat e shkreta e bjeshkët. Mos t’i lemë shtëpitë e pabanuara e qytetet fantazma. Mos të çrrënjosemi, se nuk kemi ku ngulim rrënjë më. Këtu jemi dikushi e diku tjetër jemi askushi. Në fund të fundit mos ta flakim tej historinë e familjeve e fiseve tona.
Edhe atyre që janë jashtë u them: ejani! Do të ndryshojnë gjërat po qemë bashkë të gjithë. Ne mund t’i ndryshojmë gjërat. Kthehuni e t’i banojmë edhe një herë fshatrat e qytezat tona. Keni punuar e po punoni.
Ndër vite keni ndërtuar shtëpi këtu, e tani i keni lënë bosh me ndonjë të moshuar brenda, por që nuk do të jetojë shumë. Kemi përgjegjësi për këtë vend, e jo vetëm për vete e për familjet tona. Sa trìshtim janë fshatrat tonë, lagjet e qytezat tona, kur sheh se janë zbrazur apo me njerëz që duan të ikin.
Ta bëjmë Shqipërinë t’i gëzohet pranisë tonë si nëna fmijëve të saj.
Uroj më të mirat për ju të gjithë dhe i lutem Zotit për familjet tuaja! E shpresoj se do të tingëllojë sadopak në zemrat tuaja kjo fjalë.
