Dionis Xhafa
Nacionalizmi është streha e fundit e horrave. Kështu thonë dhe kështu ka gjasa të mëdha që të jetë në të vërtetë. Është pikërisht nacionalizmi, i cili është përdorur në masë nga ana e politikanëve dhe vazhdon që të përdoret. Atë e kanë përdorur thuajse të gjithë shtetarët e vendit tonë. Pas nuk ngelet as kryeministri aktual. Pikërisht, kreu aktual i qeverisë në Tiranë, postoi në rrjetin social “Facebook” një foto, ku tregonte një fakt, se një shqiptar kishte ndërtuar Akropolin. E ç’është kjo teori? E çfarë do të thotë kjo? E pastaj se një shqiptar paska ndërtuar Akropolin?
Kjo gjë nuk ia zbeh aspak historinë Greqisë, e cila mbahet me famë në Evropë e madje edhe në botë, për historinë e saj të lavdishme në të kaluarën dhe për kulturën. Pas publikimit të fotos nga ana e Ramës, menjëherë ka pasur kritika nga ana e shtypit grek. Këta të fundit e kanë cilësuar si të paprecedentë faktin së kryeministri i një vendi si Shqipëria është “kapur” pas një detaji tepër të vogël, duke u shprehur edhe se ka tejkaluar kompetencat. Nuk është e gjitha kaq dhe çdo gjë të përmbyllet. Aspak.
Po grekëve, Rama është duke iu hequr shtëpitë dhe bizneset, duke ua shkatërruar edhe kishat. Jo vetëm kaq, por kryeministri ynë lavdërohet prej faktit se është duke shtypur e shtrydhur një minoritet, edhe pse në fakt një shtet i mirë është ai ku minoritetet respektohen dhe aty shihet fiks shteti i së drejtës. Nuk është problemi te grekët, por qofshin minoritetarë maqedonas apo serb, duhet respektuar dhe kështu vendi bën përpara në BE e në organizma të tjerë ndërkombëtarë.
E pra edhe Rama, njeriu që mund të cilësohej më kozmopolit se të gjithë, duket se pushteti e ka bërë nacionalist, duke marrë duartrokitje në Serbi dhe tashmë edhe për atë “që është duke iu bërë grekëve”. Gjithë këtë kryeministri e bën për efekt elektoral. Kjo sepse nëse ai do të ishte patriot, do të rriste pagën minimale dhe jo të mbante akoma me të mira, atë shtresë të shoqërisë, e cila është e kapur pas pushtetit dhe ka fituar punë në administratë. Padrejtësia vazhdon, nacionalizmi po ashtu, nepotizmi, shkatërrimi, e po humbet shpresa për të parë një vend, ku vërtetë ia vlen të jetohet.
D.Xh.
Lexo më tej: Deklaratat e Ramës për Akropolin ndezin Athinën
