Ruaj në kujtesë takimet tek kafe-librari “E përsh7shmja” në Mbrëmjen Poetike “Takim me Visar Zhitin”, 4 nëntor 2011. Një kënd vërtetë poetik, i vetmi në kryeqytetin shqiptar atbotë, që të afronte një mjedis të ngrohtë në aspektin shpirtëror e ku krijues e lexues të pasionuar pas poezisë këmbenin mendime rreth një zjarri natyral. Biseda ishtë e lirë, mund të merrje dhe një kafe tek dëgjoje vargjet e recituara nga vetë autorët.
E gjithë kjo atmosferë ka bërë që e premtja për poetët kryeqytetas të konsiderohej ditë e bukur, mbase më e bukura ditë e javës në Tiranë.
Dikur, …sepse tashme mjedise poetike në Tiranë nuk gjen askund.
Mungon në kryeqytet edhe Elvana Zaimi, që i organizonte aq bukur takimet poetike të premteve tek “E përsh7shmja“. Ajo është pranishme me shqipërime poetike të autorëve nga bota, por na përshendet nga Zvicra.
Kohët e fundit për shumë gjëra kemi nis të themi:…na ishte dikur.
Po përcjell një shkrim nga një prej takimeve organizuar tek “E përsh7shmja” me rastin e përurimit të antologjise poetike “Kujto Poetin” me autorë Iliriana Sulkuqi & Kolec Traboini, Ada 2011.
KUR FLET PËR TË TJERËT POHON VETVETEN
Meditim tek “E për7shtatshmja”
Ishte një mbrëmje shumë e bukur fillimdhjetori dhe ndjeva kënaqësi kur pashë se lexues me fytyra të reja e të bukura, studentë apo dhe profesorë, lexonin poezitë e 40 poetëve nga libri “Kujto poetin” në mbrëmjen poetike tek kafe-libraria e admirueshme “E për7shtatshmja”. Ishte një akt mirënjohjeje për çfarë kanë shkruar poetët që nuk jetojnë më, për çfarë kanë ndjerë, për çfarë kanë sakrifikuar në një kohë të tmerrshme mbytëse të lirisë e të shpirtit krijues…
U fol në takim për Lazër Shantojën, Trifon Xhagjikën, Havzi Nelën, Vilson Blloshmin e Genc Lekën, u kujtuan Lasgush Poradeci dhe Martin Camaj, Arshi Pipa dhe Ndoc Gjetja, Bilal Xhaferri dhe Viktor Qurku, Zef Zorba dhe Agim Spahiu, Ali Asllani, Lame Kodra, Nexhat Hakiu, Azem Shkreli, Enver Gjergjeku, Murat Isaku, Vehbi Skenderi, Din Mehmeti, Dalan Luzaj dhe Vorea Ujka e plot të tjerë, për të veçantën Drita Çomo, për poetin tragjik dhe impresionant Ilir Belliu si dhe Anvi Mulaj që ndrroi jetë në Amerikë. Por edhe për një poete që botohet për herë të parë Suzana Selenica (falë kujtimeve të Roland Gjozes), e cila u masakrua nga diktatura për shpirtin e lirë.
Eshte për t’u falenderuar përkushtimi (në këtë kohë paradoksale antiart) i organizatores së mbrëmjeve të përjavshme poetike, Elvana Zaimi, dhe mjedisin e ngrohtë që krijoi Agron Tufa, i cili e drejtoi aq bukur atë mbrëmje poetike, ku folëm si autorë të albumit “Kujto poetin” Iliriana Sulkuqi edhe unë, që kam patur fatin e madh që disa prej poetëve të këtij Albumi, si Dodë Kaçaj, Frederik Rreshpja, Tonin Shtjefni, Pirro Kuqi, Zyhdi Morava, Jamarbër Marko i kam patur shokë fëmijërie, rinie, në bankat e Universitetit apo kolegë pune.
Qenka shumë herë më bukur, kur mblidhesh e flet për krijimet e miqve sesa për vete, aq më tepër kur këta miq poetë nuk mund t’i shohim e takojmë më si dikur. Duke ma ditur këtë natyrë, është kjo arsyeja që kur po hyja në një emision Albanin Screen TV për një intervistë mbi krijimtarine time filmike dhe poetike, mikja ime poete Luljeta Lleshanaku më tha: – “Kolec, fol për vete se ke çfarë thua.”
E unë i thashë mikes sime të mirë: “Ah sikur të dija të flisja për vete“, dhe në emisionin “Orkidea” me Ema Andrea nisa te flas për Hotin – përndryshe, shkatërrimin e një miti… Sepse kam mendimin, se duke folë për të tjerët, për shokët e miqtë, për prindërit, qytetin, fshatin, prejardhjen e historinë, kemi folë shumë më mirë e shumë më bukur edhe për veten…
Kolec P. Traboini
2011 – 2021
