PENALIZIMI I PUNONJËSVE TË SHËNDETËSISË
Sistemi shëndetësor shqiptar vuan nga korrupsioni tash 30 vjet. Kjo vjen më tepër nga një sistem jo i duhur, që ne aplikojmë, se sa nga morali i punonjësve të shëndetit. Sepse nëse sistemi është privat, dhe jo falas, kuptohet se mjekët dhe infermierët marrin rrogën, e jo para nën dorë.
Atëherë pse ne nuk e rregullojmë sistemin more, por i fusim në vështitrësi, me rroga të ulëta dhe i poshtërojmë punonjësit e shëndertit, deri në atë masë, sa ata të detyrohen e të korruptohen?! Nëse ne ndryshojmë sistemin, do e shohim se punonjësit shëndetësorë do të sillen më moralshëm, nuk do të korruptohen.
Nuk ka sistem shëndetësor falas more, që funksionon mirë! Ky është shkaku kryesor, i kësaj plage shoqërore që kemi! Punonjësit e shëndetit në këto raste rreziku me Covid, rrezikojnë jetën e tyre, dhe kjo për një rrogë qesharake.
A mund t’u kërkojmë ne atyre një shërbim të mirë dhe të mos korruptohen?! A mos po u kërkojmë ne atyre të pamundurën, pak si tepër, më tepër se ata mund të bëjnë për ne falas – dhe pastaj zhgënjehemi prej tyre?! Kush e ka fajin këtu?
Ne a duam zgjidhje të qëndrueshme, apo të rropatemi pa sukses në vazhdimësi si në këto 30 vjet, ku morali i punonjësve të keq-paguar të shëndetit vetëm prishet dhe ata nuk ofrojnë shërbimin e duhur e të merituar nga pacientët.
— Arben Çokaj
Mentor Kikia
Sa herë na janë shfaqur foto si kjo e kësaj vajze, me maskë dhe uniformën e infermieres, kanë vërshuar fjalët e mira, mirënjohja, solidariteti dhe falenderimet e shumta për mjekët, infermierët dhe të gjithë personelin shëndetësor, që në këto ditë të vështira po na shërbejnë në spitale dhe shtëpi.
Por kjo vajzë sot është simboli i përbuzjes së qytetarëve. Ajo është arrestuar sepse u zhvaste para familjarëve të të shtruarve në spital.
Ky ishte “grupi“ famëkeq i Tires, pastrueses që i kishte marrë 8 milion lekë(të vjetra) vajzës së një gruaje të shtuar, që nuk i mbijetoi covidit. Përgjimet treguan se infermieret i trajtonin pacientët si mall pazari, duke numëruar paratë që u merrnin secilit.
Unë nuk do ta trondis respektin që kam për mjeket shqiptarë për këtë arsye. Por nuk do të bashkohem asnjëherë me kryeministrin e vendit tim që tha se Tirja është një rast i izoluar. Sepse unë mendoj se as “grupi i Tires” nuk është një rast i izoluar.
Sepse unë dhe shumë të tjerë në këtë vend, kemi përjetuar, dëgjuar dhe parë sesi në spitale duhet të paguash. Të gjithë e dimë që në çdo spital ka një listë çmimesh, nga kirurgu, anestezisti, kryeinfermieri, infermierja, deri tek pastruesja.
Në çdo spital, në çdo qytet!
Këtë gangrenë nuk e lufton rritja e pagës. Sado ta paguash një mjek të tillë, paga e tij do të jetë shumë më e vogël sesa rryshfeti.
Qeveritë refuzojnë ta shikojnë në sy këtë problem, por mjaftohen me një arsyetim idjot, se para se të vinim ne në pushtet, mjekët merrnin më shumë rryshfet se tani.
Kjo situatë nuk merr fund as me një ligj, as me një vendim qeverie. Duhet menduar një zgjidhje e tipit “vetting”, duke shoqëruar rritjen e pagave me masa të ashpra ligjore, por edhe me edukimin e njerëzve që pyetja e parë që bëjnë kur hyjnë në spital është: sa lekë duhet të japim.
Tirja dhe “grupi” i saj u arrestuan falë një denoncimi. Dhe këtë duhet të bëjnë të gjithë, për ata që bluzën e bardhë e nxijnë me këtë sjellje.
