Emmanuel Macron të martën në Paris
MACRON MBRON KRITIKËN NDAJ ISLAMIT:
FAZ.net, 13.02.2020
Një nxënëse franceze mori kërcënime me vdekje pas kritikave të ashpra ndaj Islamit. Presidenti Macron tani po kërkon që të rinjtë të mbrohen. Fetë mund të kritikohen, thotë ai.
Presidenti francez Emmanuel Macron ka mbrojtur studenten 16-vjeçare, Mila, e cila mori kërcënime me vdekje pas kritikave të ashpra ndaj Islamit. “Situata ligjore është e qartë: ne kemi të drejtën e blasfemisë,” i tha Macron gazetës “Le Dauphiné Libéré” nga Grenoble. Ai gjithashtu përfshin lirinë e “kritikës dhe karikaturës ndaj fesë“, shtoi kreu i shtetit.
Nxënësja e shkollës së mesme Mila, kishte publikuar një video plot me fjalë për Islamin në shërbimin e Internetit Instagram, e cila u përhap me shpejtësi. Mila sqaroi në të përditshmen Libération, se gjithçka filloi me një postim “live” në Instagram, në të cilin shkëmbeu ide me një njohje lezbike për bukurinë e grave arabe. Thuhet se një musliman ka ndërhyrë dhe i ka fyer ato si “lezbike të ndyra“.
Kjo është arsyeja pse ajo e regjistroi videon e saj, në të cilën shprehu mendimin e saj për fetë në përgjithësi dhe Islamin në veçanti. “Unë them atë që mendoj. Unë nuk jam raciste. Kam të drejtë të them atë që mendoj, nuk më vjen keq për këtë,” – tha Mila. Si rezultat, ajo u kërcënua me vrasje dhe përdhunime në internet. Ajo nuk ishte në gjendje të shkonte në shkollë me javë të tëra dhe ishte përkohësisht nën mbrojtjen e policisë.
“Mila është një adoleshente“, tha Macron. “Ne u kemi borxh atyre mbrojtjen në shkollë, në jetën e tyre të përditshme dhe kur udhëtojnë.” Ai theksoi që të miturit duhet të mbrohen më mirë kundër “formave të reja të urrejtjes dhe ngacmimit në internet“.
Studentja nga departamenti i Isère në lindje të vendit gjithashtu bën apel për “të drejtën e blasfemisë“, por kërkoi falje për “vulgaritetin” e deklaratave të saj. Në Francë, vepra “blasfemi” u shfuqizua pas revolucionit të vitit 1789. Thirrjet për të urrejtur individë ose një grup janë të ndaluara.
