SHEFQET DIBRANI · 14 mars 2019
Në 20-Vjetorin e ndërhyrjes së trupave të NATO-s në Luftën e Kosovës
Sivjet bëhen 20 vjet nga ndërhyrja e trupave të NATO-s në Luftën e Kosovës, e në kuadër të këtij përvjetori botohen dy vëllime me shkrime nga «Shtypi gjermanofolës për Luftën në Kosovë», 1999, (Die deutschsprachige Presse über den Kosovokrieg).
Në këto dy vëllime të përgatitura nga Hajdar Sadrija dhe Shefqet Dibrani, janë përfshirë 1.532 artikuj të ndryshëm me mbi 4 milion e 300 mijë karaktere, të përfshira në dy vëllime me rreth 1200 faqe të formatit A4.
Materialet janë mbledhur nga z.Hajdar Sadrija, kurse janë redaktuar, sistemuar dhe parathënien e ka shkruar Shefqet Dibrani, por publikohen me rastin e 20 Vjetorit të bombardimeve të NATO-s, mbi trupat e ushtrisë serbe në Kosovë dhe brenda në Serbi.
Siç e theksuam më lartë, materialet e prezantuara në këto dy vëllime, janë shkrime informative, komente dhe analiza të marra nga shtypi në gjuhën gjermane, të cilat për shkak të volumit i kemi ndarë në dy pjesë: Vëllimi I, përmban shkrime nga data 05.shkurt – 20.prill 1999, kurse në vëllimin e Vëllimi II, janë përfshirë shkrimet nga data 21.prill – 02.korrik 1999.
Për mbledhjen e këtyre materialeve duhet falënderuar z. Hajdar Sadrija, veprimtar i viteve të 80-ta, ndërsa gjatë periudhës, 1993-1997, ishte Kryetar i Degës së LDK-së në Zvicër. Hajdar Sadrija, është i njohur për shpërndarje të shkrimeve, broshurave dhe materialeve në shërbim të kauzës kombëtare. E disa nga këto shkrime janë botuar edhe në Gazetën «RILINDJA» që dilte në Zvicër, në shtojcën katër faqesh në gjuhën gjermane. Rubrikën në gjuhën gjermane, gjatë asaj kohe e ka përgatitur vet z. Hajdar Sadrija.
Gjithsesi angazhimi i Hajdar Sadrisë, për t’i mbledhur e ruajtur këto shënime duhet vlerësuar, ashtu sikurse e meriton për tu vlerësuar edhe veprimtaria e tij në fusha të tjera. Me një fjalë, Hajdar Sadrija, gjatë gjithë jetës së tij, ka dëshmuar një përkushtim të rrallë dhe mjaft pragmatik në shumë fusha. Edhe këto dy vëllime shkojnë në këtë drejtim.
Një punë profesionale në redaktimin teknik të shkrimeve, sistemimin e materialeve dhe faqosjen e tyre, për të dalë këto dy vëllime në mënyrë sa më të kompletuar e ka bërë Shefqet Dibrani, autor librash dhe aktivist i LDK-së në Zvicër.
Në aspektin profesional vlenë për tu theksuar se këto shkrime kanë qenë të publikuara para dy dekadash, e pasi nuk ka qenë e mundur për t’i ruajtur shënimet e publikimit në internet, siç thuhet në parathënie, ka mundësi të jenë përvjedhur ndonjë gabim a lajthitje e lehtë, përkitazi me burimin e sakt, prandaj përgatitësit kanë kërkuar ndjesë për gabimet eventuale.
Siç thuhet, librat e kësaj kategorie, kryesisht janë të karakterit arkivor, gjithsesi dokumente me vlera të veçanta historike e faktografike pasi paraqesin një pasqyrë reale të asaj kohe. Kështu siç janë radhitur e sistemuar, me të vetmin kriter aspektin kronologjik, do të vëhet në pahë angazhimi serioz i shtypit dhe mediave në hapësirën gjermanofolëse për çështjen e Kosovës. Pa dyshim shtypi dhe mediat në gjuhën gjermane, kanë pasur rol të veçantë në senzibilizimin e opinionit për atë çfarë ndodhte në Kosovë dhe rajon, veçmas atëherë kur Aleanca Verio-Atlantike, e priri nga NATO, përgatitej për ta ndalur gjenocidin dhe pastrimin etnik që serbet e bënin kundër popullit të pambrojtur shqiptarë në Kosovë.
Publikimi i këtyre materialeve bëhet në 20-Vjetorin e ndërhyrjes së trupave të NATO-s në Luftën e Kosovës. Merita e Gjermanisë, Zvicrës dhe Austrisë është e madhe. Me një fjalë hapësira gjermanofolëse në ato rrjedha kishte rol dhe ndikim specifik, prandaj le të mbetet ky publikim një falënderim modest për Aleancën Verio-Atlantike dhe për Trupat e NATO-s, të cilët me angazhimin e tyre të drejtpërdrejt në Luftën e Kosovës, realizuan pavarësimin e Kosovës nga Serbia!… thuhet pos tjerash në parathënien e shkruar nga publicisti dhe autori Shefqet Dibrani.
E krejt në fund theksohet se publikimi i këtyre materialeve në dy vëllime do të pasurojë fondin e librave të kësaj natyre, nëpër institucionet përkatëse në Republikën e Kosovës dhe më tej. Librat janë botim privat dhe të regjistruara në Bibliotekën Nacionale në Zvicër, kurse publikim është radhitur “Botim i veçantë”, me një tirazh mjaftë të kufizuar dhe pa qëllime komerciale!
Prishtinë, 13 mars 2019
*Librat janë dorëzuar në:
Bibliotekën Kombëtare të Kosovës, 3 ekzemplarë
Institutin Albanologjik, 1 ekzemplarë
Instituti i Historisë, 1 ekzemplarë
Historianit Jusuf Buxhovi, 1 ekzemplarë
Shkrimtarit Nazmi Rrahmani, 1 ekzemplarë
