Hamit Majkovci “ Shtigje jete ”, KLI “ Arif Shala “ – Prishtinë, 2018
Milazim F. KADRIU
Bisedonin dy lisa e një guri Nga kodra në kodrën tjetër A thua cili nga ne Në këtë truall, është më i vjetër
Pra këto tri monumente të natyrës Kuvendojnë nga kodra në kodër Të gjithë dyzasit i kanë në zemër Guri, Qarri, Bungu i Dyzit kanë një emër
Këto janë disa vargje të poezisë “Monumente të natyrës” që bënë fjalë për tri bukuri natyrore që ndodhen në fshatin e lindjes së autorit, pra në fshatin Dyz të Llapit e që kjo poezi është në librin më të ri të autorit Hamit Majkovci.
Libri me poezi “ Shtigje jete ” është libri i tretë me poezi i Hamit Majkovcit që i boton brenda pak muajsh. Edhe në këtë libër ndër të tjera poeti mëton t’i realizojë disa nga temat dhe motivet marrë nga e kaluara jonë e lavdishme, e tashmja që nuk është ashtu si do duhej të ishte po edhe nga jeta e përditshme, nga bukurit e natyrës…, dhe të gjitha këto i percepton përmes një ligjërimi që shquhet për tematikë të pasur dhe me kuptim të qartë, si dhe figuracion e simbolikë domethënëse.
Vargjet e poetit Majkovci vijnë me një spontanitet, por që janë mjaft mirë të përshkruara me një muzikalitet që patjetër lexuesi i pëlqen.
Edhe pse libri është i strukturuar në gjashtë cikle ( Atdheu, Nëna, Jeta, Dituria ) ai korrespondon si një tersi
Me botimin e librit të tretë brenda një periudhe të shkurtër poeti na bënë me dije se në shpirtin e tij krijues kaherë janë bluar mendime e ide të cilat kanë pritur momentin e duhur për të dal në dritë dhe për ti parë edhe të tjerët dhe për të marrë një rrugëtim të mbarë e të suksesshëm.
Edhe me këtë përmbledhje si edhe me dy të parat Hamit Majkovci na bind se me vargjet e tij po jep një kontribut të çmuar dhe po radhitet ndër poetët që po i kontribuojnë krijimtarisë poetike tek ne.
Autori në këtë libër, në fillim na sjell vargje me motive patriotike të cilat i ka përmbledh në ciklin e parë të titulluar “Atdheu” ku shpreh respektin për të gjithë ata që u sakrifikuan për atdheun dhe lirinë që ne sot e gëzojmë edhe pse akoma nuk është ajo që e dëshirojmë dhe për të cilën u derdh mund e gjak por me shpresën se një ditë do të bëhet realitet amaneti i dëshmorëve.
Ja si shprehet në disa vargje të poezisë “Atdhetari”:
Sa ditë shprese ai pati.
Dhe s’i realizoi kurrë.
Vepra i buzëqeshi
Dhe ai u bë flamur.
Fuqishëm e shpreh edhe dashurinë që ndjen për nënën dhe atdheun:
Dhe zemra dashurinë
Në gjak e fsheh
Për ty, o e dashura nënë
Për ty,o i shtrenjti Atdhe“Atdheu”
Ose vargjet për flamurin :
Pranë teje, o Flamur
Për ty, o Atdhe
Shqiptarët janë bashkuar
Pa dallim në fe
Se me atdheun nuk ka lojë dhe për te duhet të flitet me gjuhën e së vërtetës autori shprehet:
Për atdhe flitet
Me gjuhën e së vërtetës
Se shqipja, nëna, atdheu
Janë gjëra të pakrahasueshme të jetës
Edhe në këtë libër si edhe më parë poeti në shumicën e poezive thur vargje për atdheun, për heronjtë dhe figura kombëtare, për flamurin, për vendet historike, për …
Në poezinë “Simboli i rezistencës”, kushtuar Adem Demaçit, autori ndër tjera shprehet:
Nuk burgosej dëshira
As zemra e atdhetarit
Simbolit të rezistencës
Bacë, Adem Demaçit.
Autori ndërton poezi të qartë dhe të kuptueshme çfarë ia lehtëson komunikimin me lexuesit. Në poezinë “Nëna dhe Abetarja” autori ndër tjera shprehet :
Në periudhat historike
Në jetën e tyre shpirtërore
Nëna dhe Abetarja
Janë Hëna e Dielli i kësaj toke…
Larushia e temave dhe motiveve që shtjellon autori janë nga e kaluara, nga përditshmëria jonë, janë copëza jete me shqetësime, janë plotë dashuri për jetën, për bukurinë e natyrës, janë edukative e me plotë mesazhe, por që nganjëherë hasim edhe një protestë të autorit ndaj dukurive negative që nuk janë të pakta në shoqërinë tonë.
Në disa tek poezia “Përball çdo sfide” Majkovci shprehet :
Jeta të vë para çdo sfide
Në profesion, punë dhe orë
Mos mendo që ti çdoherë
Je i saktë si ora në dorë.
Ose tek poezia “Jeta” autori thotë:
Shumë gjëra mor vëlla
Pashë e mësova nga jeta
Më shumë qenë të hidhura
Sesa të buzëqeshura.
Ndërsa për dobinë që kemi nga dituria ndër tjera në poezinë me titull “Dituria “ shprehet :
Dituria të bën të njerëzishëm
Në sjellje, fjalë
Ajo mjegullën dhe errësirën
Ta bën të bardhë.
Autorin e preokupojnë edhe bukurit e natyrës dhe në disa vargje te poezia “Cicërima” ai thotë se cicërima e zogjve dhe zhurma e fëmijëve i dhen bukuri dhe gjallëri jetës.
Cicërima e zogjve
Bukuri i jep jetës
Zhurma e fëmijëve
Gjallëri e pranverës
Marr në përgjithësi libri me poezi “ Shtigje jete ” i autorit Hamit Majovci shquhet për idetë, mendimet, porosit, origjinalitetin e vargut, mesazhin që japin vargjet dhe si i tillë lidh një komunikim të kuptueshëm me lexuesin dhe mendojmë se do të pritet mirë dhe do të ketë sukses. Njëkohësisht autori na premton botime të reja në një të ardhme të afërt ku besojmë se do të sjell poezi edhe më të arrira ngase ngritja e tij është vërejtur nga libri në libër.
