Nga Kimete Berisha
LDK gjithmonë e para kur bëhet fjalë të deklarohet kundër luftës, kundër protestave, kundër bashkimit kombëtar, dhe së fundmi kundër idesë së Edi Ramës që Kosova dhe Shqipëria në të ardhmen ta kenë një President.
Thirrne urgjent edhe Interpolin, qysh e keni zanat, ta hetojnë prapavijën e ‘idesë’ së Edi Ramës.
Pra, veç ideja se mund të ndodh kjo mrekulli e tmerron Abdullah Hotin.
Po ky Abdullahu a bash kaq punë s’e kupton, që Edi Rama nuk do të mund ta fyente shtetin e Kosovës pa e fyer shtetin shqiptar, se nuk tha oj shqipe që Kosova të futet nën thundrën e Shqipërisë, e as anasjelltas, por tha që e ka një ide që në ardhmen ta kemi një President të përbashkët.
Nuk vendosi asgjë, as nuk e vuri gurin e kufirit, veç një ide e dha…
Pse i tuteni kaq shumë Edi Ramës?! (Se u thotë Sali Berisha me ba ashtu!) Juve LDK-së nuk ju ka thënë ‘lopë’! Ramushit, lopë i ka thënë, edhe nuk ju ka idhnu.
Çka ka të keqe me pas një President! Bash po më intereson ta kuptoj në thelb pse një shqiptar pa të meta mendore e urren bashkimin kombëtar!
Ne s’mund ta bëjmë një treg të përbashkët, por qysh na shkon neve politika, mund ta bëjmë një President të përbashkët.
E pse Jo! Çka po t’pengon ty kjo fantazi!
Sot është dashur që Kosova e Shqipëria t’ia nisin t’i bashkojnë ambasadat. Pse mos m’i bashku, harxhojnë më pak.
Këta t’PDK-së, t’poshtër sa të ‘dush, s’ka ku shkon më t’poshtër, ama kurrë s’habiten me folë diçka anti-kombëtare. Këtë ‘luks’ ua kanë lënë këtyre të LDK-së.
E Milazimit nuk ju kish prish hiç qejfi me pas thënë sot Ahmet Davutogllu, që Kosova duhet m’u bashku me Turqinë.
Edi Rama po e bën bashkimin kombëtar të duket normal, natyror, spontan, praktik, besa edhe modern. Është në modë sot të jemi bashkë. Mos e xhelozoni, po merrni mësim prej tij.
Dhe, kujdes. Jemi bukur një kallaballak ne që mendojmë si Edi Rama.
P.S. Sot kur parakaloi Njësia anti-drogë e Policisë së Kosovës kah këmbët e Edi Ramës, qentë nuhatës as nuk e kthyen kokën kah ai.
